Sezdingmi yoki yo‘q –
bari o‘zgardi…
Bashoratlarini buzdim ochunning.
Sen o‘ylaganchalik ko‘nglim siniqmas,
Qanoti siniqmas endi lochinning.

Ko‘nglimni bulutdan baland o‘stirdi
hali bo‘yi ishqqa yetmagan suluv.
Yaxshiyam, u senga o‘xshamas sira,
U senga o‘xshamas —
yomoni ham shu.

Ko‘p bor urinaman seni oqlashga,
Sabablar topaman sadoqatdan kam.
Eslab turmog‘imga izn ber, hech-sa,
Eslab turish kerak xatolarni ham!